Tsohon shugaban hukumar tattara kuɗaɗen shiga a Najeriya Muhammad Nani ya ce mutane ba su fahimci sabon tsarin haraji da ake son yi wa gyaran fuska a majalisa ba

A cewarsa, sabon tsarin zai amfanar da kowanne ɓangare na Najeriya.

Muhammad Nani ya ce kuskuren fahimta ne yadda wasu ke tunanin tsarin zai amfanar da jihohin Legas da Rivers kaɗai maimakon ƙasa baki ɗaya.

Ya ce tsarin zai taimaka wajen amfanar da kowanne ɓangare tare da samun wani kaso ga ɓangaren da su ke da ƙarancin kuɗaɗen shiga

Ya ƙara da cewa ya karanta sabuwar dokar da ake son yi wa gyara, ya misalta hakan da damar cin gashin kai da aka bai wa ƙananan hukumomi a Najeriya wanda ya ce shi ma tsari ne dai zai amfanar da ƙasar baki ɗaya

Muhammad Nani ya ce bayan suka da tsarin ya fara damu wasu daga cikin ƴan majalisar tattalin arziki sun fara janyewa daga goyon bayan tsarin, sai dai sun buƙaci a sake shigar da masu ruwa da tsaki don ci gaba da fahimtar dokar.

Idan za a iya tunawa, kungiyar gwamnonin arewacin Najeriya sun yi watsi da tsarin har ma gwamnan jihar Borno ya ce idan aka tabbatar da shi ba za su iya biyan ko da albashi ba.

Kudirin dai ya tsallake karatu na biyu a gaban majalisar dattawa.

A nasa ɓangaren, mataimakin shugaban majalisar dattawa Barai I. Jibrin, ya ce an yi wa dokar karatu na biyu ne don bayar da dama ga masana don yin bincike tare da nazartar sabuwar dokar.

“Ba za a iya bayar da damar yin nazarin dokar ba har sai an yi mata karatu na biyu, a don haka ba gaggawa mu ka yi ba, batu a kan hakan ma yanzu aka fara ba wai an gama ba” in ji Barau.

A cewar tsohon shugaban hukumar tattara kuɗaɗen shiga ta ƙasa Muhammad Nani, sashe na 77 da ake magana a kai na cikin dokar na iya ɗaukar shekaru uku zuwa kafin kafin fara aiwatarwa.

Sannan ya ce batun bayar da kuɗaɗen shiga ga jihohin da ke da rigistar kamfanoni ita ma an sauya ta, yadda jihar da aka shigar da kaya za ta samu kaso mai yawa

A cewarsa, sabuwar dokar za ta ƙara yawan kuɗaɗen shiga ga jihohi tare da tallafawa wadanda su ke samun karancin kudaden shiga daga asusun rarraba arzikin ƙasa.

Masana sun yi hasashen cewar farashin kan fetur na iya sake hauhawa a Najeriya.

Dakta Muda Yusuf masanin tattalin arziki ya rikicin da ke faruwaa a gabas ta tsakiya da yakin da ke faruwa tsakanin Iran da Israela na iya sake sakawa farashin man fetur ya sake hauhawa.

Haka kuma yadda darajar naira ke sake faduwa a kasuwar hada hadar kudi hakan na iya sake jefa naira cikin wani hali wanda ka iya shafar man fetur.

Sannan farashin gangar mai na dada hauhawa wanda shi ma hanya ce da dalilin iya karuwar farashin a Najeriya.

Idan ba a manta ba a ranar Laraba ne aka wayi gari da sabon farashin man fetur wanda kamfanin mai na Nnpc ke siyar da lita guda naira 1,030 a Abuja yayin da ake siyaarwa naira 1,070 a Kano.

Batun da mutane ke kokawa a kansa har ma aka yi kira ga shugaban kasa Bola Ahmed Tinubu da ya gaggauta mayar da tsohon farashin.

Karin da aka sake samu dai ya haifar da cece kuce ga yan kasar har ma da manyan yan siyasar Najeriya.

Gwamnatin tarayyar Najeriya ta bai wa dilallan man fetur izinin fara siyo mai kai tsaye daga matatar mai ta Dangote.

Gwamnatin ta ce daga yanzu ba sai dilallan mai sun tuntubi kamfanin mai na ƙasa NNPC ba.

A wata sanarwar da ministan kudi Wale Edun ya fitar yau, ya ce majalisar zartarwa ta kasa ta amince dilallan man su fara siyo man kai tsaye daga matatar ba tare da tuntubar NNPC ba.

A baya dilallan man na aika da bukatar siyo man ta shafin NNPC, bayan da NNPC ya fara siyo man daga matatar mai ta Dangote.

Dilallan sun koka kan tsaron da su ke samu kafin samun man fetur ɗin.

Sai dai a halin yanzu gwamnatin ta sahale musu fara siyo man kai tsaye daga matatar Dangote.