Gurɓacewar shugabanni! tsadar rayuwa!! Ƙunci, firgici, tashin hankali!!!
Da sunan Allah mai rahma mai jin ƙai, Allah ya ƙarawa annabi daraja.
Babu shakka waɗannan abubuwa da na fara wallafawa a sama kusan duk wani abu da zai biyo baya zai hau ƙarƙashinsu ne,haƙiƙa mutane na cikin wani hali da aka gaza gano bakin zaren.
Da yawan mutane idan ka nemi jin ra’ayinsu dangane da halin da aka tsinki kai a yau, za ka ji kai tsaye sun alaƙanta hakan ga shugabanni.
Da yawan al’amura su kan faru sai dai komai na da sababi wanda sai an bi sababin don warware yanayin da ake ciki.
Jihohi da dama ba sa cikin nutsuwa mutanen da ke rayuwa a ciki wajibi ka tausaya, ko dai ya kasance rai da lafiya bai tsira ba, ko kuma ka riski ƙuncin rayuwar da ake tamkar ba sa ƙarƙashin shugabancin ƙasar da ta mallaki arziƙi a cikinta.
Haka abin yake cigaba a kowanne lokaci za ka riski mafitar da mutane ake kamawa tamkar kumfar kogi.
Idan za mu kwatanta adalci, mu ɗauki rayuwar da ake gudanarwa a tsakani tun daga ƙasa kafin mu kalli waɗanda ke sama za mu ga cewar yanayin gurɓatacciyar raayuwar da ake gudanarwa a tsakanin mutanen da ake jagoranta a wasu lokutan ya fi ƙazanta a kan masu jagoranci.
Ga masu bibiyar kafafen yaɗa labrai sun san yadda ake kawo labaran abubuwan da ke faruwa a tsakanin talakawa a kowacce rana, wasu abubuwan ma baki ba zai iya faɗa ba.
Duk da irin yanayin da muke jefa kanmu amma muke hangen waɗanda bamusan yaya suke gudanar da rayuwarsu ba kasancewar suna inda wani ma ko hoton wajen bai taɓa gani ba.
Ta yaya za mu ga daidai? Ta yaya rayuwarmu za ta kyautata? Ta yaya al’umma za su fita daga halin da suke ciki?
Idan na shiga gonar malamai za mu ga cewar, Addinin musulunci ya tanadi hanyoyin da mutum zai samarwa kansa waraka a duk lokacin da ya so, tunda har Allah ya kan yafewa bayinsa irin kura kuren da suke yi idan suka yi tuba na gaskiya to babu shakka rayuwa za ta inganta a ji daɗinta fiye da yadda ake tsammani.
Misali, duk irin ƙuncin da ake ciki a rayuwa, mutanen da suka kasance masu ƙarancin saɓon Allah ba sa tagayyara ko jin ɗar a ransu a duk irin tsananin da za a shiga.
“Allah ya ce ku tunani a lokacin da kuka samu ni ima ni kuma zan tunaku a lokacin da kuke bukatar taimako na” Allah ya sa na faɗa daidai, da za ku kalli rayuwar mutanen da suke tunawa da Allah koda da kwayar zarra ne a yayin da suke aikata wani abu na kuskure ko ganganci, ba daidai yake da rayuwar mutanen da idanunsu ya rufe wajen saɓawa ugangiji ba tare da kawoshi a zuciya ba, wannan misali ne da za ka iya aunawa da mizanin wanda kake tare da shi.
Mu ɗauki lokaci, da za kuji ana cewa lokaci yana da albarka amma yanzu babu daɗewa nan da nan lokaci ya tafi, to mu sani cewa,albarkar lokaci tana nan kamar yadda Allah ya halicci lokaci, idan kana so ka gane, da za ka tashi cikin dare don bautawa Allah, sai ka ji kayi ka yi ka gaji daren bai ƙare ba,haka da rana, da za ka ware wani lokaci da za ka bautawa Allah cikin nutsuwa, da za ka fahimci cewa lokacin ma kamar ya maka yawa, don sai ka gudanar da duk wani abu da kake son yi kuma lokacin bai ƙure ba.
Abinda nake so mu fahimta a nan shine, kar ka damu da sai kowa ya gyaru, fara gyara kanka sai ka ƙauracewa, yunwa, tashin hankali, fargaba,firgici, da tsoro.
Waɗanda kuwa za su yi rayuwa ba tare da lisaafi ba, ma aunin a bayyane yake.
Zagi ko cin zarafin shugaba ba zai haifar da komai ba, idan ka mutu Allah zai tambayeka yaya ka yi rayuwa me da me ka aikata,kowa tambayarsa daban.
Allah ya sa mu gane mu gyara.
©️ #AbubakarMurtalaIbrahim
9/9/2020