Ra'ayi

Ra’ayi – Haƙurin Gwamna Ganduje Ya Zarce Misali

Published

3 years ago

March 9, 2022

Matashiya

Watakila mai karatu ba z ai gane me nake nufi ba sosai sai ya gama karanta wannan dan takaitaccen rubutun da na yi a kan Gwamnan Jihar Kano Abdullahi Umar Ganduje, Damo Sarkin Hakuri. Wanda a wani lokaci can baya Shugaban Kasa Muhammadu Buhari ya ce shi bai ga dan siyasa mai hakuri da juriya kamar sa ba.

Kafin ma ka je ko’ina, da wahala a ce yau akwai wani Gwamna a Najeriya da yake shan zagi da muzantawa da kage da kuma cin zarafi a kan sa da kan iyalansa, sama da Gwamna Ganduje. Kawai ya zama karkatacciyar kuka mai dadin hawa.

Duk fa rashin kyauta masa din nan da a ke ta yi masa, wanda ta kafafen sadarwa na zumunci da kuma kafafen yada labarai a ke masa su, tare da kuma taimakawar wadannan kafafen yada labarai, amma har yanzu ba mu taba samun ko da sau daya ne, da a ka ce gwamnatin jihar Kano ta dauki wani matakin Shari’ah kan ire-iren wadannan kafafen yada labarai ba.

A kashin gaskiya ma har yanzu ba mu ga Gwamnan da yake zaman lafiya da ‘yan jarida ba sama da na jihar Kano. Duk da cewar wasunsu ba sa yin aikinsu bisa ka’idojin aikin yadda ya tanadar. Har yanzu cikin tsahon kusan shekaru 7 ba wani dan jaridar da Gwamnan ya taba kai wa gaban alkali.

Amma irin wannan cin kashin da a ke wa Ganduje me ya sa ba a yi ne a wasu jihohin, musamman ma makotan Kano? An san wargi wuri shi kai. Cin mutunci har da na taba iyalansa ba sau daya ba sau biyu ba ba sau uku ba an sha yi a Jihar ta Kano. Amma ba a taba jin Gandujen Kanawa ya ce uffan ba.

Kuma fa duk da cewar wasu da ba za su iya hakura da wanann cin fuska ga Shugaban su ba, har su ka fara kai karar irin wadanda ke wannan cin zarafi, amma har yanzu, ko da shagube, ba a taba jin Gandujen ya fadi bakaken maganganu kan irin wadannan mutane ba.

Babban abin mamakin ma shine, yadda mutanen da ba su ma san ina daman su da hagunsu suke ba wai sune masu ire iren wadancan ta-ci-barkatan zance. Wallahi a cikin irinsu wadannan mutane wasu idan ka daga su a unguwanninsu, ko Naira Daya ba za a saye su ba.

Kuma wasu ba za su kara fahimtar tsabar hakurin da Ganduje ke da shi ba sai bayan ya sauka daga mulki wani ya hau. Hmmm a nan za ka kara gane wane irin hakuri Allah Ya horewa wannan dattijon.

Sau da yawa fa, shine yake hakurkurtar da mutanensa kan su daure su dinga shanye irin wannan rashin mutunci da a ke masa. Kullum ce musu yake “Ku dinga jurewa ku dinga daurewa da wadannan abubuwan. Wasu ba su san me suke fada ba. Wasu kuma ku yi musu uzurin jahilci da neman abinci.”

Kullum Ganduje ya na nunawa masoyansa da makusantan sa cewar shi fa mai hakuri kullum shi ke da riba. Ai kuwa tabbas ga shi nan a na gani.

Balarabe Yaro Kurna
skabiru863@gmail.com

Ra'ayi

Abinda Baku Sani Ba Game Da Sheikh Adil ‘al-Kalbani, Tsohon Limamin Masallacin Harami

Published

2 years ago

July 18, 2022

Matashiya

Muhammad Bashir (MacBash)

Shi dai Sheikh Adil ‘al-Kalbani, an haife shi ne a birnin Riyadh na kasar Saudiyya, a ranar 4 ga watan Afrilun shekarar 1958 – wanda yayi dai-dai da watan Ramadan a wancan lokacin – kimanin shekaru 64 ke nan yanzu.
Asalin iyayen Sheikh Adil ‘al-Kalbani yan gudun Hijrah ne daga garin Ras Al-Khaimah na Hadaddiyar Daular Larabawa – kuma sun shiga kasar Saudiyya ne a shekarar 1950.

An ruwaito cewa sabida rashin karfi da iyayen sa suke dashi a lokacin, Sheikh Adil ‘al-Kalbani ya kasance ma’aikaci a gwamnatin kasar Saudiyya a matsayin Akawu I inda daga bisani kuma ya kama aiki da Ma’aikatar Kula da Zirga-zirgar Jirage ta Kasar Saudiyya, jim kadan bayan ya kammala karatunsa nag aba da Sakandare – har ma ya fara halartar Jami’ar Sarki Sa’ud na Saudiyya.

Malamin Adil ‘al-Kalbani na farko a fannin Addinin Islama, shine Hasan ibn Gaanim al-Gaanim – inda ya karanci littafan Sahih al-Bukhari, Jami` at-Tirmidhi da kuma littafin ilimin tafsiri na Ibn Kathir duka a wurin sa.

Haka nan, Sheikh Adil ‘al-Kalbani, ya karanci ilimin tafsiri na littafin Al-Baydawi a wurin malaminsa, Sheikh Mustapha Muslim a Jami’ar Musulunci ta Imam Muhammad Ibn Sa’ud – daga nan kuma Sheikh Adil ‘al-Kalbani ya karanta littafin Akhir Tadmariyah a wurin Malam Abdullah Ibn Jibreen – ya kuma koyi karatun Al-Qur’ani Mai Tsarki a wurin Sheikh Ahmad Mustafa.

Sheikh Adil ‘al-Kalbani ya samu nasarar hayewa jarabawar da kasar Saudiyya take yiwa malamai domin zama limamai ne, tun a shekarar 1994 – inda yaci jarabawar da gagarumar nasara; kuma aka dauke shi a matsayin limami a wani masallaci daje cikin filin sauka da tashin jirage na birnin Riyadh.

Kwarewarsa A Fagen Limanci

Bayan Sheikh Adil ‘al-Kalbani ya dauki lokaci yana limanci a filin sauka da tashin jirage na Riyadh din ne, sai kuma likafarsa taci gaba, inda ya koma babban masallacin Sarki Khalid da aikin nasa na limanci.
Tun asali dama, Sheikh Adil ‘al-Kalbani, mutum ne da ya dade yana burin ya kasance daya daga cikin manyan limaman Masallacin Harami na Makkah – kuma cikin shekaru biyu kacal, cikin ikon Allah, sai Sarki Abdullah na Saudiyya, ya neme shi daya jagoranci Sallar Tarawi a Masallacin Haramin a shekarar 2008.

Haka nan, Sheikh Adil ‘al-Kalbani ya ziyarci cibiyar horarwa akan ilimin Al-Qur’ani ta Minhaj ‘ul-Qur’an ta kasar Japan dake birnin Bandu a ranar 30 ga watan Yunin shekarar 2013.
Amma duk da irin wadannan karance-karancen da Malam Adil ‘al-Kalbani yayi, kullum yakan cewa shi ba Malami bane; shi makarancin Al-Qur’ani ne kawai.

Rayuwar Sheikh Adil ‘al-Kalbani

Sheikh Adil ‘al-Kalbani magidanci ne; yana da mata biyu – kuma Allah Ya albarkace shi da yaya har goma-sha-biyu (12).

Faduwar Na’urar Gini A Makkah

A lokacin da wata na’uarar gini ta fado a cikin Masallacin Harami – a dai-dai lokacin da ake gudanar wani aikin Hajji – wanda har al’uma da dama aka ruwaito cewa sun rasa rayukan su, sai Sheikh Adil ‘al-Kalbani ya rera wata wakar fasaha – wadda a cikin ta yake kalubalantar abinda ya faru, har ta kai ga wannan karfen ya fado akan mutane.

A cikin wakar ta sa, Sheikh Adil ‘al-Kalbani yace “abu ya fado kasa kan mutane – ana tsaka da Sallah…hakika wannan ba karamin sakarci bane.”

A cikin wakar, sai ya kara da cewa “…amma sauran karafunan da basu fadowa ba; hakika sun nuna halacci da kyawun kai.”

Akidar Sheikh Adil ‘al-Kalbani

Akan batun irin akidar da Sheikh Adil ‘al-Kalbani, akwai wadanda suke ganin kamar tsaurin ta sa akidar yana shige data yan kungiyar ISIL.

Rarrabewa Tsakanin Maza Da Mata A Masallaci

Yana daga cikin abubuwan da Sheikh Adil ‘al-Kalbaniyayi wadanda suka tunzura gwamnatin kasar Saudiyya, har daga karshe aka dauki nauyin sauke hi daga mukamin limanci; irin kalubalantar doka ko tsarin rarraba mata da maza da ake yi a Masallacin Harami – inda yace “ana yiwa mata taware – da kuma barin sus u kadai” sai dai kawai a rika mu’amala dasu ne kawai ta hanyar yin amfani da na’urar amon-sauti – har ma yace “wannan ba komai bane sai tsoron mata.”

Alakar Sheikh Adil ‘al-Kalbani Da Shi’a

A wata hira da Sheikh Adil ‘al-Kalbani yayi da kafar yada labarai ta BBC tayi dashi, ya yi Magana akan Shi’a, inda ya nuna kamar ta halatta – a’amarin daya tunzura masoyansa a kasar Saudiyya.

A shekarar 2019, hakanan, Sheikh Adil ‘al-Kalbani ya janye kalamansa akan maganar da yayi dangane da Shi’a – har ma ya dogara da wani littafi na wani malami Hatim al-Awni.

Alakar Sheikh Adil ‘al-Kalbani Da Kade-Kade

A cikin wata fatwah da Sheikh Adil ‘al-Kalbani ya taba bayar wa a shekarar 2010, ya ce kida abu ne wanda ya halatta a Musulunci.

A shekarar 2019, haka nan, malam ya sake yin Magana akan fatawar sa akan kida – inda ya sake cewa ya halatta.

A shekarar 2021 cikin watan Nuwamba ne kuma, aka gano Malam cikin wani fai-fan bidiyon fim mai dogon zango mai suna Combat Field – Riyadh Season 2021.

Jan Hankali Game Da Rayuwar Sheikh Adil ‘al-Kalbani

Mutane da dama yanzu, sun duƙufa wajen yayata maganganu akan yadda rayuwar Sheikh Adil ‘al-Kalbani ta sauya – sakamakon tajriba daya samu a rayuwa – wanda ba bu wani mutum daya wuce fadawa cikin ta. Abin takaici ma, har wadansu mutanen ma, sukan wuce gona da iri; su riƙa ƙoƙarin ayyana shi a matsayin batacce ko wanda ya tabe; yabi Shaydan.

Kuma har yanzu, duk da irin faya-fayen bidiyon da ake ta yadawa na Sheikh Adil ‘al-Kalbani yana fim; ko yana cikin ruwa; ko wani abu. Ba bu wani hoto da za’a iya nuna wa na sa, tare da mace suna masha’a.

Abinda na lura shine, wadansu mutanen kamar jin dadin yada labaran Sheikh Adil ‘al-Kalbani ne – kamar su ba sa aikata laifi. A yiwa Malam addu’a; mu yiwa kan mu addu’a; mu yiwa junan mu addu’a. Allah Ya Shiryar Damu!