Labarai

Ra’ayi – Murtala Sule Garo Da Batun Tallafawa Rayuwar Matasa

Published

3 years ago

March 10, 2022

Matashiya

Daga Ishaq Muttaka Magashi

Ba wani sabon abu ba ne idan a ka sake nanata wa mutane irin tallafawa rayuwar matasa da mata da Kwamishinan Kananan Hukumomi na Jihar Kano, Murtala Sule Garo ke yi a wannan mulkin na Maigirma Gwamna Abdullahi Umar Ganduje.

Mu matasa ‘yan Kano mazauna jihohin Arewa Ta Tsakiya na Najeriya, baya ga bibiyar ayyukan raya kasa da Kwamishina Murtala Garo yake yi a daukacin kananan hukumomi 44 na Jihar, mun shaida tare da misalai barkatai, na yadda ya yi fice wajen tallafawa rayuwar matasa da masu karamin karfi da kuma marasa aikin yi.

Ba tare da wani cika baki ba, mu na sanarwa mai karatu cewar, ya je ko ya sa a duba masa a ga yadda ofis din Garo ke cika duk lokacin da a ka ce ya na cikin ofis. Mutane ne kawai daruruwa ke yin tururuwa wajen ganinsa. Daga masu maganar ayyukan al’umma sai masu kai masa bukatun kansu. Hatta a gidansa ma mutane ne ke yin tururuwa.

Kullum maganar Murtala Garo ita ce mutane, musamman matasa, su tsaya da kafarsu. Ya kan ce musu “A kama sana’a ‘yan uwana, zaman banza ba namu ne ba.”

Mu fa a wajenmu ba aibu ba ne wai dan Jami’ai sun gayyace shi dan tattauna yadda za a kara samar da zaman lafiya a wannan jiha ta mu. Ganin yadda harkokin siyasa ke kara kankama a wannan jiha ta mu.

Mai kishin matasa da al’umma shi ke da dabarun sanin yadda za a gyara rayuwar matasan. Wannan ko shakka babu. Mutumin da a ke masa kirari da Kwamandan tabbatar da Adalci da kuma ci gaban jama’a, menene kuma sabo a wajensa a harkar siyasa a yanzu haka?

A matsayinmu na ‘yan Kano samari mazauna jihohin Arewa Ta Tsakiya na kasar nan, mu na kara jaddada fatan alherinmu ga Murtala Sule Garo da yunkurinsa na ganin an magance zaman banza tsakanin al’umma musamman mata da matasa. Saboda inganta harkar tsaro a wannan kasa ta mu.

Mu na kuma tare da yabon da Gwamnan Kano Ganduje ya yi wa Murtala Garo kwanan baya yayin wani taron wata mashahuriyar kungiyar kawo ci gaban al’ummar mazabar Majalisar Dattijai na Kano Ta Arewa. Wanda a ka yi taron a dakin taro na Africa House a gidan gwamnati. Baba Ganduje mu na godiya.

BA ABINDA ZA MU CE SAI MA RANAR KAWAI !!!

Daga Ishaq Muttaka Magashi
Shugaban Kungiyar Samarin ‘Yan Kano Mazauna Jihohin Arewa Ta Tsakiya

Labarai

Matsalar Yunwa Ya Kama Ku Magance Ba Kama Masu Zanga-zanga Ba- PDP

Published

2 hours ago

September 9, 2024

Khadija Ahmad Tahir

Jam’iyyar PDP ta Kasa ta bayyana cewa abun takaici ne yadda gwamnatin tarayya ta Kama ‘yan Kasar da suka fito zanga-zangar tsadar rayuwa da a gudanar a fadin Kasar a watan Augustan da ya gabata.

Sakataren yada labaran jam’iyyar Debo Olagunagba ya bayyana hakan a yau Litinin a yayin taron manema labarai a hedkwatar hukumar da ke Abuja.

Jam’iyyar ta ce yunwa da tsadar rayuwa ne suka dauki nauyin zanga zanga a Kasar ba wasu mutane ba.

Sakataren ya ce ya kamata gwamnatin Kasar ta mayar da hankali wajen magance yunwa, ba kama masu zanga-zanga ba.

PDP ta kara da cewa tsare-tsaren da shugaba Tinubu ya bijiro da su ne ya haifar da tsadar rayuwa da ake ci gaba da fuskanta a Kasar.

Jam’iyyar ta ce abin kunya da takaici ne yadda gwamnatin Tinubu ta sanya aka kama masu zanga-zangar, inda ta ce yunwa ya kama ta kama ba talakawa ba.

Jam’iyyar ta kara da cewa ya kama jam’iyyar APC ta hankalta da zanga-zangar da ‘yan Kasar suka yi wajen magance matsalolin Kasar.

Jam’iyyar na wannan kalamin ne bayan kama Shugaban Ƙungiyar Ƙwadago na Kasa NLC Joe Ajearo da jami’an DSS ta yi a yau Litinin.

‘Yan Kasar sun gudanar da zanga-zangar lumana ne a ranar 1 zuwa 10 ga watan Augusta, inda daga baya kuma ta rikide ta koma tarzoma.

Labarai

‘Yan Bindiga Sun Yi Garkuwa Da Jami’an Lafiya Biyu A Kaduna

Published

2 hours ago

September 9, 2024

Khadija Ahmad Tahir

Wasu da ake zargi ‘yan bindiga ne sun yi garkuwa da wasu ma’aikatan jinya guda biyu mata, tare da marasa lafiya da dama, a lokacin da suka kai hari wani Asbiti da ke Kauyen Kuyallo a cikin karamar hukumar Birnin Gwari ta Jihar Kaduna.

Wani shugaban kungiyar ‘yan sa-kai a yankin da lamarin ya faru Musa Alhassan, ya bayyana cewa tun da fari bayan zuwan maharan sun fara nufar wata makarantar sakandiren gwamnati ne a yau Litinin da misalin karfe 9 safe da nufin yin garkuwa da daliban makarantar.

Acewar Musa bayan zuwan ‘yan bindigar makarantar suka tarar da babu kowa hakan ya sanya suka nufi Asibitin suka sace mutanen.

Musa ya ce ya zuwa yanzu ba a san adadi marasa lafiyar maharan suka sace ba a Asibitin.

Labarai

DSS Ta Kai Sumame Ofishi SERAP Na Abuja

Published

2 hours ago

September 9, 2024

Khadija Ahmad Tahir

Hukumar tsaron farin kaya ta DSS ta kai sumame ofishin kungiyar SERAP mai rajin kare tattalin arzikin Najeriya da ke Abuja.

Jami’an na DSS sun kai sumame ofishin ne sa’o’i kadan bayan da DSS din ta kama shugaban kungiyar kwadago ta Kasa NLC Jeo Ajaoro a yau Litinin a filin jiragen sama na birnin a lokacin da ya ke kan hanyarsa ta zuwa Kasar Birtaniya don halartar taron ‘yan kasuwa wanda za a gudanar a yau.

Sai dai bayan kama Ajerao, a wata wallafa da SERAP ta yi a shafin ta X, ta bayyana cewa, jami’an DSS sun kai’wa ofishinta na Abuja sumame, inda suka bayyana cewa su na neman daraktan kungiyar ne.

SERAP ta ce mamaye ofishinta da DSS suka yi sun yi ne ba bisa ka’ida ba, inda ta bukaci shugaba Tinubu da ya gargadi jam’an na DSS da su daina yin barazana ga mutane da kuma yin barazana ga ‘yancin ‘yan Kasar.

Kai sumame ofishin na SERAP na zuwa ne kwana guda da kungiyar ta bai’wa shugaban Tinubu wa’adin sa’o’i 48 da ya umarci kamfanin mai na Kasa NNPCL da ya janye karin farashin man da ya yi a Kasar.