Gwamnan Jihar Kogi Usman Ododo ya amince da Naira 72,500 a matsayin sabon mafi ƙarancin albashi ga ma’aikatan Jihar da kuma ƙananan hukumomi.

Gwamna Ododo ya amince da biyan sabon mafi karancin albashin ne a yau Litinin, bayan karɓar rahoton kwamitin da gwamnatin ta kafa kan mafi ƙarancin albashin ma’aikatan Jihar.

Gwamnan ya ce za kuma ayiwa ma’aimatan Jihar sauye-sauye, wanda hakan na daga cikin cika alƙawarin da gwamnatinsa ta yiwa al’ummar Jihar a lokacin yakin neman zabe.

Ododo ya kuma bayyana dakatar da cire haraji ga dukkan ma’aikatan gwamnatin Jihar har na tsawon shekara daya.

Gwamnan ya bukaci ma’aikatan gwamnatin da su goyi bayan dukkan manufofin gwamnatinsa na kawo canje-canje a fadin Jihar.

Gwamna Usman Ododo ya kara da cewa daga wannan watan na Oktoba za a fara biyan ma’aikatan mafi karancin albashin.

Shugaban Kwamitin kan Mafi ƙarancin Albashi kuma shugaban ma’aikata na Jihar Mista Elijah Abenemi ya ce an kafa kwamitin ne tun a ranar 17 ga watan Satumban da ya kare.

Shugaban ya ce kwamitin ya gudanar da aikin tantancewa tare da yadda za a fara biyan ma’aikata mafi karancin albashin.

Hukumar yaki da masu yiwa tattalin arzikin Kasa zagon Kasa ta EFCC ta bayyana rashin jindadinta bisa koma bayan da ta ke samu a cikin ayyukanta.

Shugaban hukumar na Kasa Ola Olukayede ne ya bayyana hakan ne a yau Litinin a Abuja a yayin wani taron karawa juna sani ga alkalai karo na shida wanda aka gudanar a dakin taro na cibiyar shari’a ta kasa birnin.

Shugaban ya ce daga cikin nakasun da hukumar tasu ta samu a cikin ayyukanta sun hada da haramta gudanar da bincike a wasu jihohi 10 na Kasar da ba za ta yi ba, sakamakon kotu da ta haramta mata gudanar da binciken.

Taron wanda aka yi masa take da Hada kan masu ruwa da tsaki wajen yaki da cin hanci da rashawa, shugaban bai bayyana Jihohin da Kotu ta haramtawa hukumar bincika ba.

Shugaban ya kuma koka bisa yadda ayyukan hukumar ke ci gaba da fuskantar koma baya, bisa hukuncin kotun da ya sanyawa hukumar.

Kazalika ya kara da cewa daga cikin kalubalen da hukumar ta su ke fuskantar ciki harda yadda kotuna ke dage shari’o’in manyan laifuffuka da hana hukumar kama masu laifi da dai sauransu.

Acewarsa akwai bukatar kotuna da su daina yawaita bai’wa mutanen da ake zargi takardar umarnin hana hukumar kama su a dukkan lokacin da bincike yazo kansu.

Sannan ya ce hukumar za ta gyara kura-kuranta, tare da daukar matakan gyara tsarin binciken hukumar kamar yadda dokar Kasar ta tanada.

Gwamnan Jihar Kano Injiniya Abba Kabir Yusuf ya mika sakon jaje ga yan kasuwar Kantin Kwari da al’ummar Jihar bisa iftila’in tashin gobara da aka samu a cikin Kasuwar.

Gwamnan ya mika sakon jajen ne ta cikin wata wallafa da yayi a shafinsa na Facebook a jiya Lahadi.

Gwamnan ya kuma nuna rashin jindadinsa bisa tashin gobarar da aka samu a cikin Kasuwar a gidan Inuwa Mai Mai, wanda ta kone shaguna masu tarin yawa.

A wata sanarwa da mai magana da yawun gwamnan Sanusi Bature Dawakin Tofa shima ya wallafa a shafinsa na Facebook ya bayyana cewa, gwamna ya ce gobarar da aka samu a cikin Kasuwar, hakan zai yi matukar kawo babban nakasu ga tattalin arzikin Jihar.

Dawakin Tofa ya ce a sarar da aka samu a cikin Kasuwar ba iya ga ‘yan Kasuwar kadai ya shufa ba, harma da al’ummar Jihar baki daya.

Gwamnan ya kuma bukaci da ‘yan Kasuwar da su kara lura sosai domin ganin an gujewa dukkan wani abu da ka iya kara haifar da hakan a nan gaba.

Gwamnan ya kuma yaba da irin kokarin da hukumar kashe gobara ta yi da sauran wadanda suka taimaka wajen samun nasarar kashe wutar.

Sannan yayi kira ga masu ruwa da tsaki na kasuwar da su mayar da hankali wajen kiyaye matakan kariya domin hana faruwar irin haka a nan gaba.

Gwamnan ya kuma bayyana cewa gwamnatinsa za ta tallafawa tare da nuna goyon baya ga ’yan kasuwar da abin ya shafa.