Malam Abduljabbar Kabara ya ce ya kori lauyoyinsa saboda sun saɓa yarjejeniyar da suka yi.

Malamin ya bayyanawa kotun haka a yau Alhamis yayin da ake ci gaba da sauraron shari’ar.

A cewar malamin yanzu yana sake neman wasu lauyoyin da zasu tsaya masa.

Wannan shine karo na uku, da Malamin dake tsare a gidan gyara hali, ya sake watsi da Lauyoyinsa.

Malam Abduljabbar kamar yadda ya yiwa Lauyoyinsa na baya, yana zarginsu da gaza kare shi a gaban Kotu.

Su kuwa lauyoyin gwamnatin jihar Kano sun buƙaci kotun ta umurci hukumar dake baiwa marasa ƙarfi kariya a kotu kyauta, watau Legal Aid Council da ta bawa Malamin lauyan.

A ƙarshe, kotun ta amince da hakan kuma ta yi umarni ga Legal Aid Council ta bawa Abduljabar Lauyoyin da za su kare shi.

Sai dai, Malam AbdulJabbar ya buƙaci kotu ta rabu da shi zai iya cigaba da kare kansa, tunda duk lauyan da ya ɗauka sai ya ce ana yi masa barazana da rayuwarsa.

A ƙarshe mai shari’a ya ɗage zaman zuwa ranar 26 ga Mayu, 2022.

Hukumar Hisbah a jihar Kano ta sami nasarar kama wasu mata masu ƙananan shekaru a rukunin unguwar Nassarawa ta jihar.

Mai magana da yawun hukumar Lawal Ibrahim Fagge ya tabbatarwa da Matashiya TV cewar, an kama ƴan matan ne a wuraren hokewa kamar Pikolo Joint da wani gida mai suna ICU da ke unguwar Badawa a Kano.

Hukumar ta kai sumamen ne bayan samun rahooto a kan yadda ake samun ɓata gari na ta’ammali da miyagun kwayoyi da shan shisha da sauran ayyukan ashsha a wajen.

Babban kwamandan hukumar Ustaz Haroon Ibn Sina ya ja hankalin iyaye da su dinga kula da ƴaƴansu tare da tunatar da su a kan haƙkin da ya rataya a wuyansu na kula da tarbiyya.

Sa’annan ya aike da takardar gayyata ga iyayen ƴan matan da aka kama don ganin sun zo domin tantance yaran da aka kama.

Hukumar Hisbah ta ce ba za ta lamunci yadda wasu ɓata gari ke gudanar da ayyukan ashsha a jihar ba, kuma za ta sa ƙafar wando ɗaya da duk wanda ya yi ƙokarin tsallake dokokin ta.

Hukumar Hisbah a jihar Kano ta umarci wasu matasa biyu da yin sallar nafila raka’a 100 biyo bayan furucin ɗaya daga ciki na ƙin yin salla kwata-kwata.

Bayan wani faifan bidiyo da ke yawo wanda aka hango wani matashi na yin iƙirarin daina sallah, hukumar Hisbah a Kano ta umarcesu da yin sallah raka’a 100.

A wata sanarwa da hukumar ta fitar ta ce iyayen matasan ne su ka kai yaran domin a ja kunnen su.

Shugaban hukumar Ustaz Haroon Ibn Sina ya ja kunnen matasan tare da yi musu nasiha don neman gafarar Allah.

Hukumar ta ce bayan kammala nasihar ne ta umarci matasan da yin sallah raka a 100 nan take.

Guda cikin matasan wanda ya yi suna a kafar sadarwar zamani mai suna Muhammad Ikbal ya gamsu tare da bin umarnin hukumar.

Al’amarin ya samo asali ne bayan wata hukuma ta yi wa matashin kwaryar molo wanda hakan ya fusata shi ya yi furucin daina sallah kwata-kwata har sai gashin kan sa ya fito.