Gwamnatin tarayyar Najeriya ta bayyana aniyarta na bayar da tallafin kudade ga matasan Kudu maso Kudu, a fannin noma domin bunkasa hanyoyin samun kudaden gudanar da ayyukan noma a yankin.
Ko’odinetan cibiyar Bunkasa harkokin Noma da Noma ta Najeriya a yankin Kudu-maso-Kudu, Mista Howard Usen, ne ya tabbatar da hakan a lokacin bikin kaddamar da matasan Kudu maso Kudu a harkar noma, wanda aka yi a Jihar Akwa Ibom a yau Juma’a.
Ya ce kaddamarwar ya kawo sauyi ga matasa a harkar noma a fadin yankin, yana mai cewa kungiyoyi da dama sun gaza samun kudaden da suka dace, bisa rashin tsari da kuma tsarin gudanar da mulki.
Ya bayyana cewa NADI, tare da hadin gwiwar kungiyar al’ummomin manoma ta Najeriya, za su taimakawa sabuwar kungiyar da aka kaddamar wajen samar da alkawurra da kuma ka’idojin gudanar da ayyukan da suka dace da kyawawan ayyuka na duniya.
Ya ce samar da waɗannan tsare-tsare, zai zama sauƙi ga ƙungiyoyi da hukumomi su tallafa da sanya hannun jari a cikin, inda ya ce sun himmatu wajen taimakawa kungiyar wajen kafa wadannan ka’idoji.
A cewarsa cibiyar za ta kuma hada kai da baje koli da cibiyoyi don bayar da horo ga shugabannin kungiyar a dukkan kananan hukumomin jihar, inda bayyana cewa, horon zai kunshi fannonin gudanar da hadin gwiwa, da kula da harkokin kudi, da samar da samfuran da suka dace da ka’idojin kungiyar bunkasa masana’antu ta Majalisar Dinkin Duniya.
A yayin taron an kuma kaddamar da shugabannin kungiyar reshen jihar Akwa-Ibom karkashin jagorancin Sylvester Sunday, wanda ya yi alkawarin zaburar da matasa a fadin jihar domin rungumar aikin gona a matsayin wata hanya mai dorewa ta samun wadata.