Ƴan ta’addan da suka kai hari kan jirgin ƙasan Abuja zuwa Kaduna sun sako wata mata mai juna biyu da suka sace.
Ana zargin ƴan ta’addan Ansaru da kai harin kan jirgin ƙasan tare da yin garkuwa da fasinjoji da dama.
An hango matar cikin wani faifan bidiyo tana kira ga gwamnatin tarayya da ta tattauna da ƴan ta’addan domin ceto rayukan wasu da ke tare da su.
Matar ta ce waɗanda suka yi garkuwa da su na basu kulawa, suna ciyar da su da kyau har ma da ba su magunguna.
Wata majiyar tsaro ta bayyana cewa ba a biya kuɗin fansa ba domin a sako matar ba.
Majiyar ta kuma karyata rahotannin da ke cewa wata mata ta haihu a hannun ƴan ta’addan.
Gwamnatin Tarayya tasha alwashin ceto fasinjoji sama da 60 da aka yi garkuwa da su a ranar 28 ga Maris, 2022, amma har yanzu yawancinsu suna hannunsu.
A kwanakin baya an bayar da rahoton cewa an sako mutum biyu bayan maƙudan kuɗin fansa.
Waɗanda aka sako – Manajan Daraktan Bankin Noma, Alwan Hassan da ɗan ƙungiyar Dattawan Arewa, Farfesa Ango Abdullahi, sun shafe makonni a hannunsu.
Ƴan uwan sauran fasinjojin da suka rage a sansanin ƴan ta’adda sun yi kira ga Gwamnatin Tarayya da ta yi ƙokari wajan ganin an saki ƴan uwansu.