Connect with us

Labarai

Za A Yi Zaɓe Kuma A Binciki Waɗanda Suka Yi Badaƙala A Kasuwar Kwari – Ganduje

Published

on

Gwamna Jihar Kano Abdullahi Ganduje Ya Tabbatar Da Cewa Dole Sai An Yi Zabe A Kungiyar Kasuwar Kwari, Kuma Dole Sai An Samarwa Kasuwar Doka

  • Ya kuma tabbatar da cewa za a binciki wadanda su ka wawashe kudin tallafi da a ka ba kasuwar da masu karbar kudaden ‘yan China

Saboda gujewa ci gaba da lalacewa ta fuskar ƙungiyar ƴan kasuwa da kuma tsamo kasuwanci daga dulmiyewa Gwamnan Jihar Kano Dakta Abdullahi Umar Ganduje ya sha alwashin cewa dole ne sai an yi zabe sahihi kuma sai an samar da Doka wacce za ta dinga tafiyar da harkar gudanarwa ga kasuwar Kantin Kwari a Kano.

Gwamnan ya yi wannan jawabi ne lokacin da wakilcin dandazon ‘yan kasuwar ya kai masa wata ziyarar ban girma da nuna goyon baya kan sababbin tsare tsare da gwamnatin Kano ke samarwa ga kasuwar. Sun kai wannan ziyara ne karkashin jagorancin Sharhabilu Ɗanlami Musa.

Ya karbe su ne lokacin ya na tsaka da taron Majalisar Zartaswa na Jiha tare da Mataimakinsa da Sakataren Gwamnati da Kwamishinoni da dukkan membobin majalisar Zartasawa ta jiha.

“Mun yi abubuwa da yawa a wannan kasuwa ta Kwari saboda mu na da kishin ganin ci gaban harkar kasuwanci a Kano. Mun yi tituna, mun yi ginin zamani ga ‘yan tebura, ga ofishin ‘yan sanda saboda tsaro, ga Masallaci da kuma ragowar abubuwan ci gaba da mu ka kawo a wannan kasuwa,” in ji Gwamnan.

Ya ci gaba da cewa, “Nan gaba kuma akwai shirin za mu sa katanga mai aminci sannan mu yi babbar Kofa shige da fice a wannan kasuwa. Bayan nan kuma za mu sa na’urori na zamani saboda kula da harkar tsaro.”

“Dokar da za a yi a kan wannan kasuwa, a halin yanzu, dokar ta na gaban Majalisar Dokoki ta Jiha, bayan sun gama nasu aikin ni kuma zan sa wa dokar hannu. Saboda haka dole ne sai mun yi wa wannan kasuwa doka. Dole ne kuma sai an yi zabe sahihi na kungiyar ‘yan kasuwa a wannan kasuwa ta Kwari,” ya kara tabbatarwa.

Ya kuma nuna cewar, Hukumar Karbar Korafi Da Hana Cin Hanci Da Rashawa Ta Jihar Kano, ta kawo masa bayanin cewa sun karbi bayani daga wasu ‘yan kasuwar Kwari cewar an yi badakala ga kudaden tallafi da a ka karba da sunan kasuwar.

A kan hakan sai ya ce “Za a gudanar da bincike kan wannan ta’asa da su ka yi. Ba wanda zai yi abinda ya ga dama. Kuma a kyale shi a haka.”

Sannan gwamnan ya ce ya samu wani korafin na cewar wasu ‘yan kasuwar su na karbar kudaden ‘yan China ba bisa ka’ida ba. Ya ce “Shi ma wannan za a yi bincike a kai. Ba zai yiwu a bar mutane su yi ta abinda bai kamata ba sannan su na karyar cewar wai su ne ‘yan kasuwa ko shugabanni.”

Ya tabbatar da cewa “…duk wani shakiyi ko dan cuwa-cuwa karyarsa ta kare. Da Ikon Allah dole sai mun gyara tsare tsaren kasuwanninmu.”

Saboda kuma a kara kyautata harkar kasuwanci a wannan kasuwa ta Kwari, gwamna Ganduje ya ce “Za mu Gina muku asibiti wanda zai dinga ba ku magani kyauta, a samar da likitoci da za su dinga ganin marasa lafiya kyauta.”

Daga karshe kuma gwamnan ya yi kira gare su da su tabbatar su na amfani da shawarwarin ma’aikatan lafiya wajen kiyaye yaduwar cutar COVID-19 a harkokinsu na kasuwanci da kuma a gidajensu.

Shugaban tawagar Sharhabilu ya tabbatarwa da Gwamnan cewa “Ya Maigirma Gwamnan Kano mun zo wajen nan ne dan mu kara tabbatar maka da goyon bayanmu ga duk wasu tsare tsare da wannan gwamnatin ta ke son yi a wannan kasuwa ta mu ta Kantin Kwari.”

Ya kara da cewa a matsayinsu na halastattun ‘yan kasuwar Kwari su na maraba da ayyukan alheri da gwamnatin Gandujen ta yi a kasuwar.

Daga nan sai ya lissafa abubuwa kamar tituna, da kantinan da a ka yi wa ‘yan tebura da karamin ofishin ‘yan sanda da ofishin jami’an kashe gobara. Ya kara da cewar “Ya Maigirma Gwamna mun ga yadda ka mayar mana da wannan kasuwa daga tsohon yayi zuwa sabon yayi.”

Sai kuma ya rufe da korafin cewa an yi tsawon shekaru sama da goma sha shida ba a yin zabe a kungiyar ‘yan kasuwa ta Kantin Kwari.

Abba Anwar
Babban Sakataren Yada Labaran Gwamnan Jihar Kano
Laraba, 13 ha Watan Janairu, 2021
cps@kanostate.gov.ng
fatimanbaba1@gmail.com

Click to comment

Leave a Reply

Labarai

Gwamnatin Tarayya Ta Ayya Ranakun Hutun Babbar Sallah

Published

on

Gwamnatin tarayya a Najeriya ta ayyana ranakun Litinin da Talata a matsayin ranakun hutun babbar sallah.

 

Hakan ma ƙunshe ne a wata sanarwa da ma’aikatar harkokin cikin gida ta fitar a yau Juma’a.

 

Sanarwar wadda Dakta Aishetu Ndayako sakatariyar din din din a ma’aikatar ta sanayawa hannu.

 

Ministan harkokin cikin gida Tunji Ojo ya buƙaci al’ummar musulmi da su kasance masu sadaukarwa tare da koyi da fiyayyen halitta Annabi Muhammad Sallallahu alaihi Wasallam.

 

Ministan ya ce shugaba Bola Ahmed Tinubu na aiki tukuru wajen ganin ya tsare rayuwa da lafiya da dukiyoyin al’ummar ƙasar.

 

Sannan ya buƙaci al’umma da su bayar da haɗin kai wajen ci gaban ƙasar ta yadda za a samu nasara a abubuwan da ya sa a gaba.

 

Rahotanni sun nuna cewar shugaban zai yi bikin salalrsa a jihar Legas.

Continue Reading

Labarai

Tawagar Shugaban Maniyyatan Jihar Kano Ta Isa Saudiyya

Published

on

Shugaban tawagar Alhazan Jihar Kano ya isa kasa mai tsarki domin jagoranta aikin Hajjin bana a Kasar Saudiyya.

 

Bisa managartan shirye-shirye da aiki tukuru kimanin maniyyata 3,110 ne daga jihar Kano ake sa ran zasu gabatar da aikin hajji a kasar Saudiyya.

 

Mataimakin Gwamnan Jihar Kano Kwamared Aminu Abdulsalam Gwarzo wanda shine Amirul Hajj na Kano tare da wasu daga cikin mukarraban Gwamnati da suka hada da shugaban hukumar Alhazan Jihar Alhaji Lamin Rabi’u Danbaffa da Shugaban majalisar dokokin Jihar Kano Hon Jibril Ismail Falgore da sauransu.

 

Ibrahim Garba wanda shine wanda yake jagorantar yan jaridu kuma mai magana da yawun mataimaki Gwamna jihar kano ya ce gwamnatin jihar za ta tabbatar da maniyyatan sun samu wayewa domin gabatar da hajji karbabbiya.

 

Ibrahim ya kara da cewa tawagar ta samu isa kasa mai tsarki ne ta kamfanin jirgin sama na Max Air daga filin jirgin sama na Malam Aminu Kano a ranar Asabar din nan tare da wasu daga cikin ma’aikata da sauran mutane da Gwamna Abba Kabir Yusuf ya bayar da damar suje domin taimakawa musu.

 

Ibrahim Garba Shu’aibu ya ce bayan zuwan maniyyatan sun samu tagomashin samun masauki mai kyau da abinci.

 

Daga karshe ya ce gwamnatin ta shirya ma’aikatan lafiya domin kula da lafiyar maniyyatan a Kasar ta Saudiyya.

Continue Reading

Labarai

Gwamnan Bauchi Ya Sauke Shugaban Ƙaramar Hukuma Da Mataimakinsa

Published

on

Gwamnan Jihar Bauchi Bala Mohammed ya dakatar da shugaban karamar hukumar Alkaleri na rikon kwarya Hon Bala Ibrahim daga bakin aiki.

Gwamnan ya tsige shugaban karamar hukumar ne tare da mataimakinsa kan dalilan da ba a bayyana ba.

Gwamnan ya tsige shugaban karamar hukumar da mataimakin na shine ta cikin wata wasikar kora mai dauke da sa hannun sakataren gwamnatin Jihar Ibrahim Kashim Muhammad ya fitar.

Wasikar ta umarci kantoman da mataimakinsa da su gaggauta mika harkokin shugabancin karamar hukumar ga shugaban sashin gudanarwa na karamar hukumar.

Wasikar mai dauke da kwanan watan 6 ga watan Yuni 2024 na dauke da sallamar da aka yiwa shugabannin.

Bayan fitar da takardar sakataren ya aike da ita ga babban sakatare na ma’aikatar kananan hukumomi da masarautu na Jihar.
Sakataren ya korar ta fara aiki ne nan take.

 

 

 

 

Continue Reading

Talla

Trending

%d bloggers like this: