Labarai

Yadda Aka Ƙone Mata Da Yara Da Ransu A Zamfara

Published

2 years ago

January 8, 2022

Ƴan bindigan sun kai hare-haren ne cikin ƙauyuka 10 na jihar Zamafara sannan ake zargi sun hallaka sama da mutane 200 a ƙasa da awanni 48.

Rahotanni daga jihar Zamfara na tabbatar da cewar an gano gawarwakin mutane 143 na mutanen da ƴan bindiga su ka kashe a wasu hare-hare da su ka kai wasu ƙauyukan jihar.

An kai hare-haren ne a ranakin Laraba da Alhamis a ƙananan hukumomi Anka da Bukuyyum.

Rahotannin na cewar ko a jiya Juma’a sai da aka gano wasu gawarwaki da ƴan bindiga su ka kashe, sannan ana ci gaba da lalubo wasu gawarwakin a cikin dazukan ƙauyukan.

Wani mazaunin garin ya tabbatar da cewar an hallaka sama da mutane 200 wasu da dama an ƙone su da ransu a cikin gidajen su daga cikin mutanen da aka ƙone da ransu akwia mata da ƙananan yara.

Ya ƙara da cewa ƴan bindigan sun tilasta wa mutanen zama a cikin gida sannan su ka banka wa gidajen wuta har su ka rasa rayukansu.

Ƙauyukan Rafin Danya, Barayar Zaki, Rafin Gero, Kurfa na daga cikin ƙauyukan da lamarin ya shafa.

Haka zalika wani da lamarin ya faru a gabansa wanda ya sha da kyar ya ce yan bindigan sun kore shanu da sauran dabbobi wadanda ba su gaza 3,000 ba.

Wani mai suna Malam Muhammad Sani ya ce har yanzu ƴan bindigan su na garin kuma sun hana yin jana’zar wasu da aka gano gawarwakin su a ƙauyen su.

Rundunar ƴan sandan jihar ta ce ta na ci gaba da bincike domin tattara bayanan alƙaluman mutanen da su ka rasa rayukansu a sanadiyyar hare-haren.

Labarai

Zagon Kasan Da Kwankwaso Ya Yi Wa Jam’iyyar NNPP Ya Sa Ba Muyi Nasara A Kotuba- Alhaji Abbas

Published

4 hours ago

September 21, 2023

Amina Muhammad

Babban jigo a jam’iyyar NNPP, Alhaji Abbas Onilewura ya zargi dan takarar shugaban kasa a jam’iyyar, Rabiu Kwankwaso kan rasa nasarar jam’iyyar a jihar Kano.

A jiya Laraba 20 ga watan Satumba kotun ta yanke hukunci inda ta tsige Gwamna Abba Kabir na jam’iyyar a matsayin gwamna.

Kotun kuma ta tabbatar da Nasiru Gawuna na jam’iyyar APC a matsayin wanda ya lashe zaben.

Yayin da ya ke martani kan hukuncin, Abbas ya ce Kwankwaso ya siyar da jam’iyyar lokacin da ya ke tattaunawa da APC kan mukamin minista a Abuja.

Onilewura ya bayyana haka ne a yau Alhamis 21 ga watan Satumba a cikin wata sanarwa da ya fitar.

Ya ce zagon kasa da Kwankwaso ya yi wa jam’iyyar ce ya jawo rashin nasararta a hukuncin kotun da aka yanke a jiya.

Ya kara da cewa Wannan rashin nasara babbar asara ce a jam’iyyar mu kuma hakan ya faru ne saboda son rai na Kwankwaso wanda ya siyar da jam’iyyar.

Labarai

Gwamnatin Delta Ta Amince Da Rage Kaso 25 Na Kudin Jami’a A Jihar

Published

17 hours ago

September 20, 2023

Amina Muhammad

Gwamnatin jihar Delta ta amince da rage kashi 25 na kudin makarantar daliban jami’a a jihar.

Wannan dai wani bangare ne na tallafin da gwamnatin za ta bai wa daliban kuma ya shafi jami’a hudu mallakin jihar.

Hakan na kunshe a wata sanarwa da babban sakataren yada labaran gwamnan Festus Ahon ya sanyawa hannu ranar Laraba.

Sanarwar ta ce gwamnan ya bayar da umarnin bai wa ma’aikatan jihar tallafin naira dubu goma kowanne tsawon watanni uku.

Sannan an amince da kashe naira biliyan 5.522 ga ma’aikata 50,196 a matsayinalawus da aka yi musu karin matsayi.

Sannan gwamnatin za ta kashe naira biliyan goma wajen raba buhun shinkafa 17,000 da sama da buhu masara 60,000 ga marasa karfi.

Labarai

Cibiyar Kare Hakkin Yan Jaridu Ta Yi Allah-Wadai Da Cin Zarafin Yan Jarida A Kano

Published

17 hours ago

September 20, 2023

Amina Muhammad

Cibiyar kare hakkin yan jarida ta duniya ta yi Alla wadai da cin zarafin yan jarida da wasu yan sanda su ka yi a Kano yau Laraba.

Salim Umar na jaridar Daily Trust da Zahradden Lawal na jaridar BBC an ci zarafinsu tare da lalata layan aikinsu yayin da us ke bakin aiki.

Babban jami’in kare hakkin yan jarida na duniya Melody Akunjiyan ne ya bayyana haka a wata sanarwa da ya aikewa manema labarai a yau.

Cibiyar ta ce abin takaici ne ganin yadda yan sandan su ka nuna rashin kwarewa ta hanyar cin zarafin yan jaridan yayin da su ke bakin aiki.

Cibiyar ta bukaci hukumar yan sanda ta kasa da su kula tare da kiyayewa a gaba wajen cin zarafin yan jarida musamman idan aiki ya hadasu da jami’an yan sanda.