Wasu da ake kyauta zaton mayaƙan ƙungiyar Boko Haram tsagen ISWAP ne sun hallaka baturen ƴan sanda a wani hari da su ka kai jiya Litinin.

Maharan, sun hallaka baturen ƴan sandan ne a yayin da su ka kai hari kan wasu jami’an lafiya.

Ma’aikatan lafiyan sun kira don sanar da jami’an ƴan sanda dangane da harin da aka kai musu, sai dai jami’in ya rasa ransa yayin da ya ke ƙoƙarin daƙile harin su ka hallakashi

Rahotanni sun nuna cewar mayaƙan sun kai hari Marte, su ne da misalin ƙarfe 07:30pm na daren jiya.

Wasu bayanai daga majiya cikin jami’an tsaro, sun ce an kashe baturen y’an sandan sannan an raunata wasu mutane biyu.

Zuwa yanzu babu wata sanarwa a hukumance dangane da kisan babban jami’in

Wasu da ake kyauta zaton ƴan bindiga ne sun sun yi garkuwa da mutane 20 a wani sabon hari sa su ka kai Dawaki, kusa da Kubwa da ke Abuja.

Ƴan bindigan sun kai harin rukunin gidajen Frank Opara tare da yin awon gaba da mutane 20.

Shugaba a yankin Dawaki Tunde Abdurrahik wanda ya shaida hakan ga manema labarai, ya ce ƴan bindigan sun kai harin ne da ƙarfe 7:30 na daren Lahadi wayewar jiya Litinin.

Ya ce ƴan bindigan sun kusa su 50, ɗauke da makamai, sun ɓalle ƙofofin gidaje hida sannan su ka yi garkuwa da mutanen.

Yayin da take bayani dangane da harin, mai magana da yawun ƴan sanda a Abuja Josephine Adeh ta ce jami’ansu sun kai ɗaukin gaggawa wanda har ta kai ga sun yi musayar wuta da maharan.

Ta ce kwamishinan ƴan sanda da kansa ya jagoranci mayar da martani ga ƴan bindigan, kuma an ceto waɗanda aka yi garkuwa da su yayin da ƴan bindigan su ka gudu ɗauke daa rauni harbi a jikinsu.

A ranar Lahadin dai, sai da ƴan bindiga su ka yi garkuwa da mutane Biyar a Shagari Quaters da ke Dei-Dei duka a Abuja.

Hukumar tsaron farin kaya ta DSS a Najeriya ta ce an samu ƙaruwar zaman lafiya da raguwar ta’addanci a cikin mulkin shugaba Bola Ahmed Tinubu.

Yayin da yake gab da cika shekara guda a kan karagar mulkin ƙasar, darakta a hukumar DSS Adamu Gwary ya ce an samu raguwar aikata laifuka a Abuja tun bayan hawan shugaba Bola Ahmed Tinubu.

Yayin da yake zantawa da kamfanin dillancin labarai na ƙasa NAN, Adamu ya ce an samu ci gaba ta ɓangaren tsaro a Abuja tun bayan da aka naɗa Nyesom Wike a matsayin ministan Abuja a watan Agustan shekarar 2023 da ta gabata.

Wannan bayani nasa na zuwa ne ƙasa da kwana uku da aka kai mabambantan hare-hare aka sace mutane da dama a Abuja.

Daraktan ya ce a baya ana kiransu don sanar da su matsalar tsaro a kowacce rana, sai dai a yanzu ana iya shafe mako guda ba tare da an sanar da su wata matsala na faruwa ba.

La’akari da yadda aka samu ƙarancin rahoton kai hareharen, ya ce an samu cigaba a ɓangaren tsaron matuƙa a Abuja.